Poeti Lulzim Tafa pranon dekoratën ”Oficer i Urdhërit Kombëtar të Letrave dhe Arteve” nga Franca
Poeti i njohur kosovar Lulzim Tafa ka pranuar dekoratën “Oficer i Urdhrit Kombëtar të Letrave dhe Arteve” nga shteti i Francës.
Kjo dekoratë është nënshkruar nga Ministrja e Kulturës Franceze, Rima Abdul Malak, ndërsa Tafës ia ka dorëzuar ambasadori francez në Prishtinë, Olivier Guerot.
Këtë çmim e ndan Ministria e Kulturës së Francës dhe nga viti 1957 dhe është nën patronatin e Presidentit të Republikës së Francës, Emmanuel Macron, njofton KlanKosova.tv
“Oficer i Urdhrit Kombëtar të Letrave dhe Arteve” është dekorata më e lartë që shteti francez e jep në fushën e artit dhe letërsisë dhe po ashtu është edhe dekorata më e lartë që ndonjë artist apo shkrimtar nga Kosova e ka marrë deri më tani nga shteti francez.
Me këtë dekoratë Franca nderon personalitete të shquara franceze dhe ndërkombëtare për të arritura në fushën e artit dhe të letërsisë.
Lulzim Tafa është njëri ndër poetët kosovarë më të njohur në botë, veprat e të cilit janë përkthyer në rreth tridhjetë gjuhë të botës. Lulzim Tafa po ashtu ka fituar shumë çmime prestigjioze ndërkombëtare, mban shumë tituj nderi në akademi dhe universitete ndërkombëtare.
Ndër të tjera është anëtar i Akademisë së Shkencave dhe Arteve të Evropës si dhe anëtar i Akademisë së Shkencave, Arteve dhe Letërsisë në Paris.
The post Poeti Lulzim Tafa pranon dekoratën ”Oficer i Urdhërit Kombëtar të Letrave dhe Arteve” nga Franca appeared first on Klan Kosova.
