“Reja e drunjtë” në Sheshin “Skënderbej”

Në kuadër të Tetorit Gjeman, Bashkia e Tiranës në bashkëpunim me Ambasadën Gjermane kanë inaguruar instalacionin “Wooden Cloud” ose “Reja e drunjtë”, vepër e skulptorit gjerman, Martin Steinert.
Për ngritjen e këtij instalacioni në sheshin “Skënderbej”, një kontribut të veçantë kanë dhënë edhe studentët e Akademisë së Arteve në Tiranë.
Ky instalacion prej druri synon të krijojë një kanal komunikimi për të gjithë qytetarët, të cilët mund të shprehin dëshirat, ëndrrat dhe pritshmëritë e tyre.
Me rastin e inagurimit të këtij instalacioni, Ambasada Gjermane organizoi edhe koncertin festiv “Rapsodia e Hapësirës së lirë”, e konceptuar nga Edit Pulaj dhe e kompozuar nga Profesor Fatos Qerimaj, si një përkthim muzikor i kontekstit filozofik që mbart projekti europian “Hapësira e lirë”.
“Tetori gjerman” do të përmbyllet me një festival, i cili do mbahet në datat 30, 31, Tetor dhe 1 Nëntor, duke u zhvilluar paralelisht në 22 qytete të Europës, përfshirë këtu edhe Tiranën.
Koncerti “Rapsodia e Hapësirës së Lirë” do të luhet nga javën e ardhshme nga Orkestra e Brukselit dhe do të shikohet live te “Reja”.