Nis Festivali i 15-të Ndërkombëtar i të Drejtave të Njeriut në Shqipëri,

Nis Festivali i 15-të Ndërkombëtar i të Drejtave të Njeriut në Shqipëri, një ndër festivalet më të rëndësishëm në vend, e një ndër 41 festivalet e ngjashme që zhvillohen në botë. Këtë vit, do të vijnë në fokus të drejtat e grave dhe fëmijëve e do të paraqesë për publikun 41 filma të realizuar 2-3 vitet e fundit, shumica premierë, të pashfaqura më parë të artistëve nga vende si Shqipëria, Austria, Gjermania, Franca, Danimarka, Zvicra, Italia, Maqedonia e Veriut, Shba, Brazili etj.
Për shkak të situatës së pandemisë, festivali do të shfaqet vetëm në mjedise të jashtme, te kinemaja verore e Akademisë së Filmit dhe Multimedias Marubi, te lulishtja pranë Kryeministrisë, në Arkivin Qendror Shtetëror të Filmit, por edhe te Akademia e Sigurisë apo në disa shkolla të mesme në Tiranë, në një kohëzgjatje më të madhe, për 11 ditë nga data 14 shtator deri në 24 shtator.
Gjithashtu, festivali në bashkëpunim me Qendrën për Hapje dhe Dialog organizojnë edhe një konkurs video për të drejtat e njeriut duke vënë në dispozicion deri në 20 shtator online formatin e aplikimit për të rinj shqiptarë nga 14 deri në 22 vjeç dhe duke u dhënë mundësinë atyre që të shprehen artistikisht për temën e festivalit këtë vit. Ambasada Austriake është mbështetësja kryesore e këtij festivali.