Shuhet Mjeshtri i Madh i humorit Gëzim Kruja

Arti shqiptar dhe veçanërisht humori është në zi. Mjeshtri i Madh i humorit Gëzim Kruja ka ndërruar jetë në moshën 81 vjeçare. Ai prej kohësh ishte në gjendje jo të mirë shëndetësore.
Karrierën humoristike Kruja e ka nisur që në moshën 13-vjeçare. Fillimet me Estradën amatore nisin që në kohën kur ishte ushtar më 1958. Më pas vazhdon aktivizimin në vitin 1960 me Estradën profesioniste të Shkodrës.
Gëzim Kruja ka mbaruar në vitin 1979 Institutin e Lartë Pedagogjik, dega e Gjuhës dhe Letërsisë në Shkodër. Ka shkruar 15 komedi, 10 recitate, 2 libra me monologë gazmor.
Kruja ka interpretuar mbi një mijë role në skeçe të ndryshme dhe ka 52 vite që ushtron profesionin e humoristit.
Për kontributin e dhënë në vitin 2004 ka marrë titullin “Krenaria e Qytetit”. Në vitin 2005 merr titullin “Naim Frashëri i Artë” dhe në vitin 2010 titullin “Mjeshtër i Madh”.