Në Tiranë mbahet Festivali i 15-të Ndërkombëtar i Filmave për të Drejtat e Njeriut

Në Tiranë më 14 shtator nis Festivali i 15 Ndërkombëtar i Filmave për të Drejtat e Njeriut.
Ai është ndër festivalet më të rëndësishme në vend, i ngjashëm me shumë festivale që zhvillohen në botë.
Festivali i sivjetëm do të sjellë në fokus të drejtat e grave dhe fëmijëve.
Ai do të paraqesë për publikun 41 filma të realizuar 2-3 vitet e fundit.
Shumica e tyre janë filma premierë, krijime të artistëve nga vende si Shqipëria, Austria, Gjermania, Franca, Danimarka, Zvicra, Italia, Maqedonia e Veriut, ShBA, Brazili etj.
Për shkak të situatës së pandemisë festivali do të shfaqet vetëm në mjediset jashtëme të Kinemasë Verore të Akademisë së Filmit dhe Multimedias Marubi, te lulishtja pranë Kryeministrisë, në Arkivin Qendror Shtetëror të Filmit, Akademia e Sigurisë si dhe në disa shkolla të mesme në Tiranë.
Festivali do të zgjasi deri në 24 shtator.
Pjesë e festivalit dhe bashkëpunimit me Qendrën për Hapje dhe Dialog, do të jetë dhe organizimi i një konkursi për të rinj për krijimin e një videoje për të drejtat e njeriut. Deri në 20 shtator një format aplikimi on line do të jetë në dispozicion për të rinjtë shqiptarë nga 14-22 vjeç.
Festivali i 15 Ndërkombëtar i Filmave për të Drejtat e Njeriut mbështetësin kryesor financiar ka Ambasadën Austriake në Tiranë.