Muzetë e Krujës, gjatë pandemisë ofruan ture virtuale dhe publikime në rrjetet sociale

Prej nëntorit të vitit 1982, kur u hap për vizitorët, Muzeu Kombëtar i Krujës, mbylli dyert për herë të parë marsin e këtij viti. Masat që imponoi pandemia, prekën dhe muzetë, galeritë e artit, monumentet e kulturës apo sitet arkeologjike.
Por dhe kjo e pati një të mirë. U krijua mundësia për të bërë ndërhyrje specifike në godinë, apo objektet e ekspozuara, që nuk mund të bëhen në kohën kur ka vizitorë. Kështu ndodhi dhe në dy muzetë e Krujës.
Mehdi Hafizi drejtor i muzeve të Krujës thotë se “e shfrytëzuam këtë periudhë me kujdesin më të madh”.
Stafi i këtyre muzeve, ndër më të mirët dhe të mirëmbajturit në vend, nuk u ndanë asnjë ditë as nga të interesuarit. Gjetën forma e mundësi për të qenë pranë tyre, madje për shkak të përdorimit të teknologjisë afruan më shumë të rinjtë tek informacioni i muzeut. Klodian Loka, përgjegjës i muzeut historik kombëtar “Gjergj Kastrioti Skënderbeu” i Krujës thotë se turet virtuale ishin shumë efikas. Prej aplikacioneve më të suksesshëm, që përdor muzeu ishte aplikacioni, “Skënderbeu në kohë”Ai thotë se lajmi i mirë është se muzetë do të hapen më 18 maj.
Në Muzeun Kombëtar Historik te Krujes janë të ekspozuar mjaft objekte, dokumente dhe bibliografi origjinale, që flasin qartë për historinë e popullit shqiptar në shek. XV e më gjerë, ndersa ne Muzeun Kombëtar Etnografik te Krujës i përuruar në 1989-en, ne nje ndertese te Toptanajve te vitit 1764, gjen objekte origjinale nga 60-70 deri ne 500-vjeçare.