Marrëveshja finale Kosovë-Serbi, Grenell takime në Mynih me Thaçin dhe Vuçiç

Përpjekjet e të dërguarit amerikan Grenell për afrimin e një tryeze dialogu mes Prishtinës e Beogradit kanë vijuar edhe në Mynih, ku lider të dy vendeve ndodhen në kuadër të konferencës së sigurisë që po mbahet atje.
Në këtë konferencë pritet të nënshkruhet sot edhe marrëveshja e negociuar për hekurudhat mes Prishtinës e Beogradit. Duke folur për DW presidenti i Kosovës Hashim Thaçi, tha se takimi i mbrëmshëm me të dërguarin special të SHBA Grenell, ishte konstruktiv dhe i frytshëm. Për nënshkrimin e kësaj marrëveshjeje mësohet të jetë rënë dakort në takimet e veçanta që Grenell zhvilloi mbrëmë me presidentin e Kosovës Thaçi dhe atë serb Vuçiç. Presidenti Thaçi tha se me ambasadorin Grenell është biseduar edhe për arritjen e një marrëveshje finale me Serbinë, e cila do t’i sillte Kosovës anëtarësimin në Organizatën e Kombeve të Bashkuara dhe njohjen reciproke.
Ndërkohë në takimin e Grenell me presidentin e Serbisë, Aleksandar Vuçiç është nënvizuar vendosmëria e të dërguarit amerikan në domosdoshmërinë e heqjes së taksës ndaj mallrave serbe. Vuçiç tha se heqja e taksës është kushti për vazhdimin e dialogut me palën kosovare. Presidenti serb u shpreh i gatshëm për vazhdimin e bisedimeve, që sipas tij nuk do të jenë të lehta. Presidentët e Kosovës dhe Serbisë nuk përjashtojnë mundësinë që këtë vit të arrihet ndonjë marrëveshje finale mes palëve.