Imami rikthen “Don Zhuanin”
Duke sprovuar veten në regji, e vuri për herë të parë në skenë në vitin 1996, por shpejt erdhi 1997 dhe shfaqja nuk bëri atë bujën që ai do të donte. U ndërpre!
E pasi askush përveç tij nuk e kujtua më për këtë vepër, pas 24 vitesh Artan Imami i rikthehet sërish “Don Zhuanit” të Molierit, si për të çuar deri në fund kumtet e neoklasikut heretik, që me këtë vepër në 15 shkurt të 1665, në Pallatin Mbretëror të Parisit, shkaktoi skandal, pasi i bëri një apologji libertinizmit, shkëputjes nga dogmat morale dhe fetare, duke bërë armik edhe kishën e cila e bllokoi shfaqjen.
Sa qe gjallë Molieri, “Don Zhuani” nuk u dha më kurrë.
Artan Imami vjen edhe si aktor, si Don Zhuani, edhe si regjisor, madje edhe si skenograf. Por kostumet ia ka besuar bashkëshortes së tij, Florenca Bellovas. Shfaqja jepet tek Art Turbina bashkë me të tjerë aktorë të komedisë tragjike si: Luiza Xhuvani në rolin e Dona Elvirës, në rolin e Sganarelit, shërbëtorit të Don Zhuanit, Xhejni Fama. Të tjerë aktorë edhe Dajana Nenaj, Alesia Xhemalaj, Genti Deçka, Donald Shehu e Xhuliano Brisku.
Pas vënies në skenë të Mashtrimit, një tjetër vepër e ngjitur në skenën e Teatrit Kombëtar nga Artan Imami dy vjet e gjysmë më parë, dhe Don Zhuanit, duket se Artan Imami nuk ka ndërmend t’i largohet më skenës së teatrit.
