Javën e ardhshme publikohet libri “Të damkosurit e Ballkanit” i Shkëlzen Gashit

Publicisti Shkëlzen Gashi ka njoftuar se gjatë javës tjetër do të publikohet libri nga ana e tij, lidhur me tekstet rreth Historisë së Ballkanit.
Ai në Rubikon ka thënë se libri i tij do të titullohet “Të damkosurit e Ballkanit”.
“Janë 30 faqe analizë e librave, ka tre javë që po botohet në vazhdime. “Të damkosurit e Ballkanit” do të dalë si botim i veçantë. Fokusi i kritikave të mia kanë qenë shqiptarët në perandorinë Osmane, Luftërat Ballkanike, kurse në tre librat e fundit i trajtojnë vetëm Kosovën dhe shqiptarët në ish Jugosllavi. Dhe Libri i fundit është vetëm lufta në Kosovë”, ka thënë Gashi, njofton Klan Kosova.
Gashi ka përmendur historianin Frashër Demaj, që ka punuar në projektin e përmbledhjes së historisë së vendeve të Ballkanit, e i cili ditë më parë ka thënë se Gashi nuk ka të drejtë në atë çfarë thotë për këtë projekt.
“Është përpjeke për personalizim të debatit dhe në këtë grackë nuk futem. Duhet të përgjigjet në kritikat për secilin prej librave ku ai është autor. Kam bërë kritikë se si është përfaqësuar Kosova në këto libra. Ai duhet të përgjigjet në kritikat e mia. Ai më ka fyer shpesh, psikopat më ka thënë, skizofren dhe ka paralajmëruar padi në vitin e kaluar”.
“Duhet ta ketë të qartë se në vitet 2012, 2013, 2014 … kam folur kundër teksteve mësimore të historisë që përmbajnë gjuhë urrejtëse. Ai më ka cilësuar se unë s’jam historian. Ai duhet ta ketë të qartë se kritika për tekste mësimore të historisë, bëhen gjithkund në botë, prej politikologëve, antropologëve, filozofëve, shkencëtarët e fushave shoqërore që kanë të drejtë t’i analizojnë tekstet”.
The post Javën e ardhshme publikohet libri “Të damkosurit e Ballkanit” i Shkëlzen Gashit appeared first on Klan Kosova.