Ruçi: Fuat Boçi ishte një aktor i madh, artist i shquar dhe personalitet i humorit dhe artit dramatik shqiptar

Kryetari i Kuvendit, Gramoz Ruçi, me fjalë të ndjera ka shprehur ngushëllimet e tij me rastin e ndarjes nga jeta të Artistit të Merituar Fuat Boçi. “Fuat Boçi ishte një aktor i madh, artist i shquar dhe personalitet i humorit dhe artit dramatik shqiptar. Si aktor themelues i Estradës së Fierit, më 1957, dhe aktor i teatrit “Bylis”, Fuati u dha këtyre trupave, humorit dhe teatrit shqiptar një kontribut të pakrahasueshëm. Galeria e personazheve që krijoi Fuati janë dhe do të jenë të gjallë në artdashësit dhe qytetarët shqiptarë. Arti dhe humori shqiptar humbi një ndër emblemat e veta, qyteti i Fierit humbi një qytetar të rrallë e të nderuar, Shqipëria një artist, qytetar dhe personalitet të rrallë” shkruan zoti Ruçi.