Çelet ekspozita me piktura “Fituam Jetën”, frymëzimi i Abaz Hados në kohë pandemie

Pandemia e virusit korona preku të gjithë botën. Diku më shumë e diku më pak, virusi ka ndikuar në jetët e të gjithëve ne. Kështu ka ndodhur edhe me piktorin Abaz Hado, i cili sjell një ekspozitë të larmishme në këtë periudhë të vështirë për njerëzimin.  Një ekspozitë krejt ndryshe, për arsye se nisi në momente shumë specifike për artistin, ku pa u qetësuar akoma nga tërmeti vendi u godit nga Covid-19.
Nën kujdesin e Muzeut Historik Kombëtar të Shqipërisë në Tiranë është çelur ekspozita me piktura me temë “Fituam jetën”, e artistit dhe kritikut të artit Abaz Hado.
Sipas autorit, simbolika e kohës në këtë ekspozitë lidhet me kohën e COVID-19, kohën e trëndafilave dhe kohën e “qyteteve pa jetë”, sidomos duke pasqyruar momente nga jeta gjatë karantinës.
Ekspozita titullohet “Fituam Jetën”, ajo përmban dhjetëra punime dhe do të qëndrojë e hapur për rreth dy javë në mjediset Muzeut Historik Kombëtar të Shqipërisë.