Милдред Пирс

HBO ја претставува својата најнова мини серија: „Милдред Пирс“, која ги оживува незаборавните ликови од класичниот роман на Џејмс М. Кејн од 1941 во кој се прикажани гордоста и привилегиите на средната класа. Во серијата игра познатата актерка, Кејт Винслет (добитничка на Оскар за „Читачот“) во главната улога, а косценарист и режисер е Тод Хејнс (номиниран за Оскар за сценариото „Далеку од рајот“). Оваа драма во пет дела претставува интимен портрет на една уникатно независна жена која се разведува за време на Депресијата, па се бори да изгради нов живот за себеси и за своето семејство. Драмата ја прикажува неразумната посветеност на Милдред кон својата разгалена ќерка, Веда (која ја игра Еван Рејчел Вуд во подоцнежните делови), како и сложените врски кои таа ги дели со безволните мажи во својот живот, како и нејзиниот љубовник, играч на поло, Монти Берагон (Гај Пирс) и поранешниот сопруг, Берт Пирс (Брајан Ф. О'Бирн). Прв дел: Глендејл, Калифорнија, 1931. Милдред Пирс, млада мајка со пекарски талент се разведува откако го исфрла од дома својот сопруг, Берт. Присилена да бара работа за да се издржува себеси и своите две млади ќерки, 11-годишната Веда и 7-годишната Реј, Милдред оди во една агенција за вработување, но таму има само работни места за кои таа смета дека не се на нејзиното ниво. При барањето работа, таа добива совети од својата пријателка и сосетка, Луси Геслер, па почнува неочекувана афера со еден поранешен деловен партнер на нејзиниот маж, Воли Бурган. Кога Милдред добива повик од агенцијата околу една понуда за работа како чистачка кај една богата жена, таа неволно се согласува да се сретне со неа. По интервјуто, Милдред оди во едно локално кафуле каде судбината и една келнерка по име Ида ќе играат улога во обликувањето на нејзината иднина.