Содржина
Пред крајот на Втората светска војна, Индијанецот Џими Пикард кој се борел во Франција, станува пациент во една психијатриска воена болница во која се лекуваат поранешни војници. Подолг период Џими има јаки главоболки поради кои губи контакт со реалниот свет, дури понекогаш и не гледа и не слуша ништо.
Кога неговиот лекар не успева да ја најде причината за неговиот проблем, последна надеж му е францускиот антрополог и психоаналитичар Жорж Деверо, кој се специјализирал за културата на Индијанците.
Уште на првата средба меѓу нив се воспоставува врска која се базира на почитување и доверба. За време на терапијата Џими се повеќе „се отвора” и соработува. Тој се потсетува на своите соништа и ги открива длабоко потиснатите спомени. Иако по природа е срамежлив и не ги знае тајните на психоаналитичките методи, Џими и се препушта на терапијата и му дозволува на Деверо да го води неговото лекување.
По прикажувањето на филмот првите критики биле многу позитивни и го издвоиле филмот како главен фаворит за Златна палма на Филмскиот фестивал во Кан во 2013, како и номинации за наградата Цезар во 2014 во категоријата за најдобра режија, сценарио и најдобар филм.