Содржина
Дејството на филмот се случува од 1927 до 1931 г. Приказната започнува во периодот кога немиот филм заминува во историјата, а на неговото место доаѓа звучниот филм. Го следиме Џорџ Валентин, големата ѕвезда на немиот филм, кој со потсмев ја отфрла идејата за звучни филмови. Гордата ѕвезда наскоро завршува на маргините, зашто кинематографијата бара нов вид ѕвезди, а нивно совршено отелотворување е младата глумица Пепи Милер на која тој ѝ помагал во почетоците на кариерата. Нејзините филмови редат успеси и таа станува миленичка на публиката, а одговорот на Џорџ на новите околности е снимање сопствен нем филм во кој тој се јавува како режисер, продуцент и главен лик. Филмот пропаѓа, а крахот на берзата сосема го уништува финансиски, па Џорџ набргу останува разочаран, сам и заборавен од сите, освен од Пепи...