“Qielli im” i Ilirian Zhupës nën interpretimin e katër artistëve

Poema “Qielli im” e poetit Ilirjan Zhupa e interpretuar nga aktorët e mirënjohur Luiza Xhuvani, Ndriçim Xhepa, Zamira Kita dhe Kristian Koroveshi u shfaq për herë të parë për publikun, pasi ishte xhiruar gjatë muajve të verës në kishën e Shën Nikollës në Voskopojë.
Vepra ndikon te publiku për të reflektuar për dashurinë, pasionin, jetën, krijimin sidomos në këtë periudhë kaq të vështirë që mbarë bota është duke kaluar. Poema u shfaq në mjediset e jashtme të Muzeut Historik Kombëtar si një mënyrë për të qëndruar pranë publikut.
Ideatori i këtij eventi Kristian Koroveshi kishte për qëllim që me realizimin e këtij materiali, jo vetëm të na bëjë të ngremë sytë nga qielli dhe të reflektojmë në këtë situatë të vështirë, por edhe që vëmendja të shkojë tek trashëgimia e jashtëzakonshme kulturore që ne kemi në vendin tonë. Kjo është gjithashtu edhe një mënyrë alternative dhe e vecantë se si artistët dhe arti të gjejnë mënyra  për të arritur qëllimin e tyre dhe të vijnë pranë publikut.
Koroveshi shprehet se publiku ynë ka shumë nevojë për këtë formë komunikimi dhe se është vetëm hera e parë e kësaj forme e të servirurit të artit dhe trashëgimisë.
Në vazhdimësi, sipas tij, do të kemi edhe organizime të tjera të kësaj forme. Ai gjithashtu u bën thirrje kolegëve të tij që të jenë sa më pranë publikut me poema, sepse është një mënyrë shumë e mirë për të qenë prezent tek ata.