Si do të ringjallet Dimali?

Projekti për rikthimin e qytetit antik të Dimalit në një qendër arkeologjike të vizitushme po synohet të kthehet në realitet.
Me anë të një studimi të paraqitur nga disa arkeologë shqiptar shumë shpejt kjo zonë do të kthehet në një pikë strategjike në hyrje të qarkut të Beratit, një nga zonat turistike më të njohura të Shqipërisë.
Krijimi i shtigjeve natyrore të vizitorëve, vendosja e tabelave orientuese e shpjeguese përgjatë shtigjeve që të çojnë në qytetin e lashtë, krijimi i një qendre pritëse të vizitoreve dhe ngritja e një muzeu të vogël didaktik janë objektivat e parë të projektit, thotë arkeologu Ols Lafe .
Të ftuar në këtë paraqitje ishin edhe përfaqësues të Kuvendit të Shqipërisë të cilët e mbështesin fort këtë ide. Deputeti Fadil Nasufi një nga mbështetësit e nismës së krijimit të Bashkisë Dimal tha se shumë shpejt Parlamenti do të votojë kërkesën e këshillit bashkiak të Urës Vajgurore që ajo të marrë emrin e lashtë.
Fillimisht bashkia do të synojë ndërtimin e rrugës, çuarjes e rrjetit të ujit dhe energjisë, si dhe krijimit të rrjetit të sigurisë. Ato do të ndihmojnë ngritjen e një qendër pritëse dhe muzeu në Dimal, thotë Juliana Memaj Kryetare e Bashkisë së Urës Vajgurore.
Pas të gjitha këtyre përpjekjeve për të rijetëzuar këtë qytet i cili është zbuluar vetëm në 10% të sipërfaqes, Ministria e Kulturës do të duhet ta rikthej në Zonë të Mbrojtur këtë vendodhje të rëndësishme arkeologjike të trevës mijëravjeçare të Beratit.