Ambasadori Dervishi sjell librin “50 vjet marrëdhënie me jashtë”
Ambasadori Dashnor Dervishi sjell librin “50 vjet marrëdhënie me jashtë”, një përmbledhje e shënimeve të mbajtura gjatë veprimtarisë së tij në shërbimin e jashtëm diplomatik shqiptar. Në këtë botim gjenden kujtimet dhe përshtypjet e ambasadorit në 20 vitet e para të karrierës së tij, deri në vitin ’92, kohë në të cilën Dervishi shërbente si ambasador i Shqipërisë në Romë.
Drejtori i RTSH-së, Thoma Gëllçi, mik i ambasadorit Dervishi tha se ka nisur ta lexojë që atëherë në mënyrë simbolike, këtë libër, që e ka shtyrë edhe ta botojë.
Kolegë të ambasadorit Dervishi, Bashkim Zeneli dhe Lisen Bashkurti ndanë vlerësimet më të larta për punën e tij në shërbimin e jashtëm diplomatik shqiptar.
Po kaq vlerësime diplomati i njohur shqiptar mori edhe nga Prof. Et’hem Ruka, Rektor i Universitetit “Luarasi„ ku ai jep sot kontributin e tij.
Vetë ambasadori Dervishi dha edhe pikëpamjen e tij sa i përket zhvillimit të shërbimit të jashtëm në Shqipëri, ndërsa renditi si faktorë të rëndësishëm qëndrimin e ndaj çështjes shqiptare të çdo vendi, si edhe qëndrimin e shtetit shqiptar ndaj minoriteteve.
Anila Bisha, drejtuese e Shtëpisë Botuese “Mediaprint” foli për mbresat e saj rreth librit.
Dashnor Dervishi është një diplomat karriere që ka punuar në shërbimin e jashtëm për 50 vite. para viteve në 90 ai ka shërbyer në vendet e Amerikës Latine, më pas në Itali, Izrael, Rumani e Greqi.
